У МЗС Беларусі быў выкліканы часовы павераны ў справах Польшчы ў Беларусі Марцін Вайцяхоўскі. Яму паведамілі, што беларускі бок пакідае за сабой права на адэкватныя меры рэагавання. Пра гэта паведамляе прэс-служба ведамства.
«Яму заяўлены рашучы пратэст у сувязі з абвешчанымі дзейным польскім кіраўніцтвам планамі прыпыніць 10 лютага 2023 года з 14.00 паводле беларускага часу рух у пункце пропуску „Баброўнікі — Бераставіца“», — гаворыцца ў паведамленні.
Польскаму дыпламату данеслі «контрпрадуктыўнасць любых спробаў ціску на Беларусь» і «антыгуманны характар» рашэння закрыць пункт пропуску.
«Польскае кіраўніцтва наўмысна стварае нечалавечыя ўмовы для простых грамадзян і перавозчыкаў, наносіць істотную шкоду як буйным эканамічным аператарам, так і дробнаму бізнесу. Найбольшую шкоду зазнаюць еўрапейскія кампаніі і грамадзяне, перш за ўсё польскія. Як вядома, беларускія перавозчыкі праз раней прынятыя польскім бокам пастановы перасякаць мяжу не могуць», — заявілі ў МЗС.
Там таксама адзначылі, што ўся адказнасць за рашэнне ляжыць на ўрадзе Польшчы, і польскім прадпрымальнікам параілі задаць яму «адпаведныя пытанні».
У ведамстве падкрэслілі, што беларускі бок пакідае за сабой права на адэкватныя меры рэагавання.
Нагадаем, паводле рашэння польскага боку, з 10 лютага з 12.00 (14.00 паводле мінскага часу) польскі пункт пропуску «Баброўнікі» афіцыйна прыпыняе афармленне транспартных сродкаў і асоб, якія ідуць праз мяжу, на няпэўны час «у інтарэсах дзяржаўнай бяспекі».
Раней, у 2021 годзе, польскі бок з прычыны міграцыйнага крызісу закрыў пункт пропуску на беларуска-польскай мяжы «Брузгі — Кузніца Беластоцкая». Яшчэ раней, у 2020 годзе, з ініцыятывы польскага боку праз COVID-19 былі закрытыя пункты пропуску «Славатычэ — Дамачава» і «Полаўцы — Пясчатка».
Такім чынам, на беларуска-польскай мяжы застаецца толькі два дзейныя пункты пропуску — для грузавога транспарту ў Польшчу застаецца адзіны пункт пропуску «Кукурыкі» (з беларускага боку — «Казловічы»), а для легкавога — пункт пропуску «Тэрэспаль» (з беларускага боку — «Брэст»).
