Яшчэ некалькі гадоў таму ўкраінцы вельмі пазітыўна ставіліся да Аляксандра Лукашэнкі, што пацвярджалі яго першыя месцы ў рэйтынгах ацэнкі замежных палітыкаў. Але ў 2022 годзе недавер да яго сярод жыхароў суседняй краіны зашкаліў. Пра гэта сведчаць вынікі сацыялагічнага даследавання, праведзенага ва Украіне ў канцы снежня кампаніяй «Інфа сапіенс» на замову аналітычнага цэнтра «Новая Еўропа».
Даследаванне было прысвечанае таму, як жыхары краіны ацэньваюць працэс руху Украіны ў ЕС. Таксама ўкраінцаў пыталі пра іх стаўленне да гіпатэтычных мірных перамоваў з Расіяй, давер да міжнародных арганізацый і замежных палітыкаў.
Акурат у апошнім пытанні і ішла гаворка пра Аляксандра Лукашэнку. Выявілася, што яму не давяраюць (хутчэй ці цалкам) 94,3% рэспандэнтаў. У 2021 годзе такіх было нашмат менш — 59,2%. У той жа час пра давер Лукашэнку ў гэтым апытанні заявілі ўсяго 3% украінцаў, у той час як год таму тых, хто давярае, было 29,4%.
У выніку Лукашэнка другі год запар аказаўся на другім месцы ў рэйтынгу недаверу ўкраінцаў. Вышэй за яго — толькі Уладзімір Пуцін. Свайго саюзніка прэзідэнт Расіі, што напала на Украіну, апярэдзіў ненашмат: пра недавер Пуціну паведамілі 97,2% рэспандэнтаў (у 2021 годзе — 76,7%). У даверы расійскаму лідару прызналіся толькі 0,6% (год таму — 12,1%).
Акрамя таго, украінцы моцна не давяраюць кіраўніку Кітая Сі Цзіньпіну і прэзідэнту Венгрыі Віктару Орбану (73% і 69%, амаль у тры разы больш, чым год таму). Таксама ў пяцёрку недаверу ўвайшоў прэзідэнт Францыі Эманюэль Макрон (49,1%, а было 35%). На пяткі яму наступае лідар Турцыі Рэджэп Эрдаган, узровень недаверу да якога (46,6%) вырас больш чым удвая.
А вось у лідарах даверу ва ўкраінцаў аказаліся прэзідэнт Польшчы Анджэй Дуда (86,8%, ці +34% да мінулага года), прэзідэнт ЗША Джо Байдэн (79,4%, ці +30% да мінулага года), кіраўнік Еўракамісіі Урсула фон дэр Ляен і брытанскі прэм’ер Рышы Сунак (73% і 64,2%, у мінулым годзе іх не было ў рэйтынгу), старшыня Еўрапейскага савета Шарль Мішэль (51,3%, рост у два разы).