Незалежных экспертаў Валерыю Касцюгову і Таццяну Кузіну асудзілі на 10 гадоў калоніі агульнага рэжыму. Суд прызнаў іх вінаватымі ў змове з мэтай захопу ўлады, распальванні варожасці і закліках да дзеянняў супраць нацбяспекі, паведамляе «Еўрарадыё».
Мінскі гарадскі суд прызнаў іх вінаватымі ў змове з мэтай захопу ўлады (ч.1 арт. 357 КК), распальванні варожасці (ч. 3 арт. 130 КК) і закліках да дзеянняў супраць нацбяспекі (ч. 3 арт. 361 КК) і прызначыў 10 гадоў калоніі агульнага рэжыму кожнай, прысуд вынесла суддзя Дзіна Кучук. Менавіта такі тэрмін прасіла абвінавачанне.
Валерыя Касцюгова — палітолаг, рэдактар аналітычнага сайта «Наше мнение» і рэдактар-укладальнік выдання «Белорусский ежегодник». Яе затрымалі 30 чэрвеня 2021 года, у кватэры правялі ператрус.
Таццяна Кузіна — эксперт у галіне дзяржкіравання, стваральніца Школы маладых менеджараў публічнага адміністравання SYMPA і даследчага цэнтра BIPART. Яе затрымалі ў мінскім аэрапорце ў ноч на 29 чэрвеня 2021 года, калі яна спрабавала вылецець у Грузію.
Праваабаронцы прызналі абедзвюх экспертак палітзняволенымі.