Праца камісіі па вяртанні на радзіму грамадзян, што з’ехалі, будзе працягнутая. Пра гэта заявіў генеральны пракурор Андрэй Швед, перадае БЕЛТА.
«Праца камісіі будзе працягнутая. Мы лічым, што яна ўносіць сваю лепту ў вырашэнне шэрагу пытанняў», — сказаў Андрэй Швед.
Паводле яго, камісія ўжо разгледзела 241 заяву, 19 чалавек вярнулася ў Беларусь (некаторыя прыязджалі і вярталіся па некалькі разоў).
«Прыкладна 40 асобам дадзеныя тлумачэнні пра тое, што яны могуць спакойна вяртацца: у нас да іх няма ніякіх прэтэнзій. Але я ведаю, што частку з іх дастаткова шчыльна апрацоўваюць замежныя спецслужбы. Мы ведаем факты. Тым людзям, якія будуць вяртацца, мы будзем даваць слова, і ад іх вы пачуеце, даведаецеся ўсю праўду пра тое, як „салодка“ жывецца за мяжой, якое да беларусаў стаўленне і якім чынам і хто перашкаджае вяртанню нашых грамадзян на сваю радзіму», — падкрэсліў генеральны пракурор.
«Любы, хто хоча вярнуцца, звяртайцеся. Вы атрымаеце аб’ектыўную інфармацыю, і ўсе гарантыі, якія акрэсленыя ўказам кіраўніка дзяржавы, безумоўна, будуць выкананыя. Вы спакойна заедзеце ў нашую краіну, як ужо заехала 19 чалавек. З кожным з іх вы можаце пагаварыць. Усё, што пішацца за мяжой, што нібыта тут кагосьці затрымалі і гэтак далей, — такіх фактаў мы не ведаем. Акрамя аднаго: асоба вярнулася сюды, але была затрыманая за ўчыненне іншага злачынства. Гэта ж не значыць, што, калі асоба вярнулася, у яе імунітэт ад адказнасці за іншыя злачынствы», — растлумачыў Швед.
Што за камісія
Нагадаем, у 2022 годзе Лукашэнка заявіў пра «прынцыповае рашэнне» стварыць міжведамасную камісію для працы з беларускімі эмігрантамі. Камісія пад кіраўніцтвам Андрэя Шведа разглядае звароты беларусаў, якія хочуць вярнуцца, і паведамляе, ці ёсць да чалавека прэтэнзіі з боку ўладаў, а таксама пра магчымасць вярнуцца, не трапіўшы за краты.
Аднак людзі, якія вярнуліся ў краіну пасля звароту ў камісію, усё роўна зазнаюць крымінальны пераслед.
У лістападзе 2023 года асудзілі 30-гадовага брастаўчаніна Ігара Неміровіча, які вярнуўся ў Беларусь праз зварот у камісію па вяртанні. Яму прызначылі адзін год калоніі паводле ч. 1 арт. 368 КК (Абраза Лукашэнкі). Пры гэтым суд не прызнаў зварот у камісію «безумоўнай падставай для вываду пра яго раскаянне».
А ў снежні 2023 года прапагандысты апублікавалі інтэрв'ю з Таццянай Собаль, якая, як паведамляецца, таксама вярнулася ў Беларусь праз камісію. Жанчыну прымусілі расказаць пра тое, як ёй было кепска за мяжой і як яна, «паддаўшыся ўплыву», удзельнічала ў пратэстах у 2020 годзе. У выніку Таццяну чакае суд — ёй інкрымінуюць «народны» артыкул 342 КК. Яна знаходзіцца на волі — пад закладам.
Чытайце таксама
