Прэм’ер-міністр Літвы Інгрыда Шыманітэ сцвярджае, што дзяржаўныя ўстановы краіны не заўсёды паслядоўна падаюць інфармацыю пра пагрозы, якія ідуць ад беларускай дыяспары. Яна таксама заявіла, што пагрозы бяспекі адзначаныя і з боку іншых сацыяльных груп, піша выданне LRT.
— Урад прыняў не адно рашэнне, каб значна зменшыць гэтую масавасць. Мне здаецца, што нашыя інстытуцыі любяць часам ставіць гэтае пытанне не да канца паслядоўна. Бо такія ж пагрозы адзначаюцца і з боку іншых сацыяльных груп, — цытуе Інгрыду Шыманітэ выданне.
Палітык таксама ўдакладніла: «Мы не можам сказаць, што ўсё ўяўляе пагрозу. Вось чаму ў нас ёсць інстытуцыі для перадухілення гэтых пагроз. У тым ліку і Дэпартамент дзяржбяспекі».
Нагадаем, нядаўна спецслужбы Літвы прадставілі штогадовую ацэнку пагроз нацыянальнай бяспецы. Самай вялікай з іх названая вайна Расіі супраць Украіны пры суўдзеле Беларусі. Аднак там пералічаныя і іншыя, у тым ліку магчымая інтэнсіўная «апрацоўка» беларускай дыяспары, якая расце ў Літве, каб збіраць разведдадзеныя. Акрамя таго, як лічаць спецслужбы Літвы, КДБ можа спецыяльна ўкараняць калабарацыяністаў у шэрагі беларусаў-палітэмігрантаў.
