Пасажырскі лайнер авіякампаніі Austrian Airlines трапіў пад град падчас прызямлення ў аэрапорце Вены і атрымаў сур’ёзныя пашкоджанні. Стыхія разбурыла ашалёўку насавой часткі самалёта і пашкодзіла вокны ў кабіне пілотаў, яны пасадзілі самалёт «усляпую». Пра гэта паведамляе Kronen Zeitung.
«Самалёт Airbus A320, які выконваў рэйс OS434 з Пальма-дэ-Маёркі ў Вену, атрымаў пашкоджанні падчас граду. Лайнер трапіў у навальнічную зону на падыходзе да Вены, якая, паводле экіпажа, не была відаць на метэарадыёлакатары», — растлумачылі пазней у авіякампаніі.
Паводле пасажыраў, «прызямленне прайшло трохі больш бурна, чым звычайна», адчувалася моцная трасяніна, але яны не падумалі, што адбываецца нешта незвычайнае. Аднак пілоты змаглі пасадзіць самалёт без здарэнняў, ніхто не пацярпеў.
Калі пасажыры выйшлі з самалёта, то ўбачылі, што пярэднія шыбы былі выбітыя, а насавая частка наогул адсутнічае — яна проста адарвалася.